ინტერბიზნესის აკადემიაში ჩატარდა ტრენინგი თემაზე „გლობალური ინფექციის კონტროლის გაიდლაინი".ტრენინგს უძღვებოდა ისრაელის ბარზილაის საუნივერსიტეტო კლინიკიდან მოწვეული ლიცენზირებული ანესთეზიოლოგი, სამხედრო ექიმი თამთა კაპანაძე, რომელმაც მონაწილეებს გაუზიარა საერთაშორისო პრაქტიკა და თანამედროვე სტანდარტები ინფექციის კონტროლის მიმართულებით. ღონისძიებაში მონაწილეობდნენ: „საექთნო საქმის“ პროფესიული პროგრამის სტუდენტები, აკადემიის დასაქმებული კურსდამთავრებულები, პარტნიორი კლინიკების ექთნები, "საექთნო საქმის" პროფესიული საგანმანათლებლო პროგრამის მასწავლებლები. შეკრებილ საზოგადოებას სიტყვით მიესალმნენ კერძო კოლეჯების ასოციაციის პრეზიდენტი კახაბერ ერაძე და ექთნების ასოციაციის პრეზიდენტი ქეთევან გარსევანიშვილი.   ტრენინგი ინტერაქტიულ ფორმატში წარიმართა. დასსრულს, მონაწილეებს გადაეცათ სერტიფიკატები. აღნიშნული შეხვედრა წარმოადგენს პილოტირების პროცესის ნაწილს, რომელიც მიზნად ისახავს საერთაშორისო პარტნიორული ურთიერთობებისა და პროფესიული თანამშრომლობის გაძლიერებას.

ინტერბიზნესის აკადემიასა და One World - სწავლა საზღვარგარეთ -ს შორის გაფორმდა თანამშრომლობის ხელშეკრულება, რომელიც სტუდენტებისთვის საერთაშორისო სასწავლო შესაძლებლობების გაძლიერებასა და გრძელვადიანი პარტნიორობის განვითარებას ისახავს მიზნად.პროგრამა, რომელიც სპეციალურად ინტერბიზნესის აკადემიის სტუდენტებისთვის შეიქმნა, ხორციელდება ჩეხეთის ერთ-ერთ უმსხვილეს სახელმწიფო უნივერსიტეტთან — Czech University of Life Sciences თანამშრომლობით და აერთიანებს თეორიულ და პრაქტიკულ სასწავლო კომპონენტებს. კურსის ფარგლებში სტუდენტები იმუშავებენ მინი-ჯგუფებში და შეასრულებენ კვლევით პროექტს.    

საქართველოს კერძო კოლეჯების ასოციაციის ორგანიზებით შპს ინტერბიზნესის აკადემიაში ჩაატარა სამუშაო შეხვედრა, რომელიც დაეთმო დისტანციური სწავლების შესახებ მოქმედი რეგულაციის ცვლილებების განხილვასა და პრაქტიკული რეკომენდაციების შემუშავებას. შეხვედრას ესწრებოდნენ ასოციაციის გამგეობის წარმომადგენლები, ასევე საგანმანათლებლო სერვისების კომიტეტის წევრები. დისკუსიის ფარგლებში მონაწილეებმა გააანალიზეს რეგულაციის ძირითადი მოთხოვნები, გამოწვევები და დისტანციური სწავლების განხორციელების პრაქტიკული ასპექტები, რის შედეგადაც შემუშავდა რეკომენდაციების პაკეტი, რომელიც მიზნად ისახავს დისტანციური სწავლების ხარისხიანი, პასუხისმგებლიანი და ეფექტიანი დანერგვის მხარდაჭერას კერძო პროფესიულ კოლეჯებში. შეხვედრის შედეგად მიღებული რეკომენდაციები უახლოეს პერიოდში გახდება საინფორმაციო შეხვედრის თემა. საგანმანათლებლო სერვისების კომიტეტი ასოციაციის წევრ კოლეჯებთან გამართავს სპეციალურ სესიას, სადაც დეტალურად განიხილება როგორც რეგულაციის მოთხოვნები, ასევე რეკომენდაციების პრაქტიკული გამოყენება. საქართველოს კერძო კოლეჯების ასოციაცია კიდევ ერთხელ უსვამს ხაზს, რომ იგი მნიშვნელოვან და სისტემურ ძალისხმევას დებს კერძო კოლეჯებში პროფესიული განათლების ხარისხის შენარჩუნებისა და მისი უწყვეტი გაუმჯობესებისათვის, რაც ასოციაციის ერთ-ერთ უმთავრეს პრიორიტეტს წარმოადგენს.